الشاعر : صويلح بن عبيسان الشيباني

( راح العمر )

راح العمر يابنت لأجل الدراسة = والعمر لو جبتي شهادات محدود

لو الشهادة توصلك للرياسة = يفز قلبك كل ماصاح مولود

الزوج والطفل الصغير وحساسه = مطلب بنات الحي مافيه منقود

والبيت والأولاد عز ووناسه = ماينحرم من شوفهم غير مقرود

من جاء يبي قربك ورأيه براسه = لاتجعلين المدرسة عذر ملدود

قولي نعم من طيب قلب وحماسه = قبل وصول البيض ومغادر السود

والشيب يغدر بالمجاديل باسه = والعمر بعد اللين يابس كما العود

الوضع مايخفى عليك انتكاسه = الى بلغ سنك ثلاثين مع زود

تبقين أسيرة للشقا والتعاسه = ويبقى ضميرك بالهواجيس مشدود

زهرة شباب الآدمي هي أساسه = من عاشها مرتاح ماعنه منشود

واليا تزعزع كل يوم انتكاسه = يبني آمال ويصبح البني مهدود